2008-03-28

我哋大家


維園點點燭光已經滿佈,
紅館今晚最多人嘈,旺角亦要封路,
全港大集合然後個個抱一抱,
我哋大家,在獅子山遇上。

一起高聲唱吧,你係咪要賑災?
彼此抓緊信念,奧運就係未來。
大合唱最好,唱吧,藍天可愛,
我哋求求其唱,信就會精彩。

一起祝福啦啦,你我勇闖啦啦,
大家大家大家大家也來共創神話。
一起跨出啦啦,你我發展啦啦,
係信就嚟啦,大家大家嚟啦,明日會更啦啦。

華仔一班fans已經殺到,
陳太跟班太太嚟埋,華人全部上路,
胡溫大踏步台上向各界宣佈,
我哋大家,在今天且共濟。

一起衝出宇宙,你係咪要搭檯?
彼此不分國籍,一一相親相愛!
落力去唱好,我哋同天比賽,
繼續求求其唱,信就無天災。

一起祝福啦啦,你我勇闖啦啦,
大家大家大家大家也來共創神話。
一起跨出啦啦,你我發展啦啦,
係信就嚟啦,大家大家嚟啦,人哋啦我又啦。

香港始終啦啦,有你更加啦啦,(OK啦!)
人山人海大家唔洗怕,橫掂有大家。
啦啦啦乜都假,無你我點啦啦?
讓我哋大家,So La Me La Do La 全賴你個啦啦。

以空洞處處的啦啦啦嘲諷樣辦式大合唱歌詞,一本正經地惡搞各款群星大合唱歌,林海峰回應〈香港始終有你〉的方式實在抵死有趣,令人會心微笑。雖然歌詞沒有實在內容,反覆啦啦啦之間見不到那種政府最喜歡堆砌的圍威喂、疑似百花齊放歌舞昇平場面,卻隱隱然見到我哋大家回歸十年的影子。亞洲國際都會是空泛口號,新奇的建築和幻彩詠香江是硬繃繃的死物和花費,我哋大家的重點,就是活生生的我哋大家。

那個無聊透頂的音樂錄像,看著看著我竟覺得很感動。因為在嘲笑當中,見到林海峰對這個地方的愛;因為有愛,所以繼續唱繼續玩。

〈我哋大家〉,收錄於林海峰2008專輯《我哋大家》。

沒有留言:

發佈留言

Related Posts with Thumbnails